Օգտուելով Լիբանանահայ օգնութեան խաչի առողջապահական յանձնախումբին եւ Արաքսի Պուլղուրճեան ընկերաբժշկական կեդրոնի կազմակերպած դասախօսական շարքերէն` մասնակիցներ իրենց շնորհակալական խօսքերը յղած են կազմակերպիչ մարմիններուն:
Ստորեւ կը ներկայացնենք նամակներէն օրինակներ:
Ձեր կողմէ կազմակերպուած դասախօսական շարքը իրապէս դաստիարակիչ եւ օգտաշատ նախաձեռնութիւն մըն էր: Գնահատելի էին դասախօսներուն սպառիչ կերպով ներկայացուցած նիւթերը: Կը գնահատեմ մանաւանդ կազմակերպիչ յանձնախումբին ու ԼՕԽ-ի տնօրէնին մնայուն ներկայութիւնը եւ ցուցաբերած մտահոգութիւնը ներկաներուն առողջական վիճակին նկատմամբ: Ներկաներուն մեծ մասը ենթարկուեցաւ արեան քննութիւններու եւ անհրաժեշտութեան պարագային բժշկական քննութեան:
Շնորհակալութիւն ԼՕԽ-ին եւ կազմակերպիչ յանձնախումբին մանաւանդ բոլոր հովանաւորներուն:
Վարձքերնիդ կատար:
ԱՐՇԱԿՈՒՀԻ ՏԷՐ ԽԱՉԱՏՈՒՐԵԱՆ
Իմ սրտագին շնորհաւորութիւններս կը յայտնեմ ԼՕԽ-ի Արաքսի Պուլղուրճեան կեդրոնի տնօրէնութեան, ինչպէս նաեւ ատենապետին` այս դասախօսական շարքը կազմակերպելու համար: Կարեւոր գիտելիքներ ձեռք ձգեցինք առողջապահական եւ մաքրութեան ծիրին մէջ եւ վարձատրուեցանք անվճար արեան քննութեամբ եւ հիւրասիրութեամբ: Կ՛աղօթեմ Արաքսի Պուլղուրճեան կեդրոնի բարգաւաճման ի խնդիր:
Շնորհակալութեամբ`
ՎԵՐԺԻՆ ԽԸՏԸՐԵԱՆ
Առողջապահական յանձնախումբի նախազգուշական բաժանմունքի կազմակերպած այս տարուան դասախօսական շարքի աւարտին կու գամ յայտնելու ձեր աշխատանքին նկատմամբ գնահատանքս ու շնորհակալական խօսքս:
Մենք` 100-է աւելի հետեւողներ, օգտուեցանք թէ՛ առողջապահական, եւ թէ ընկերային մարզին մէջ: Օգտուեցանք նաեւ տարրալուծարանի բժշկական եւ ատամնաբուժական անվճար ծառայութենէն: Շնորհակալութիւն նաեւ հիւրասիրութիւններու համար: Ձեզի կը մաղթեմ յարատեւ կորով եւ յառաջդիմութիւն:
Ձեր բոլորին վարձքը կատար:
ՄԱՐՕ ՊԱԳԱԼԵԱՆ-ՌԱՍԼԱՆ