ԼՕԽ-ի Շրջանային Վարչութիւնը, գործունէութեան շրջանի աւարտին, գեղեցիկ գաղափարը ունեցաւ իր հովանիին տակ գործող 26 մասնաճիւղերու վարչութիւններուն համար կազմակերպել միօրեայ շրջապտոյտ մը դէպի Պեքաա:
Օրը սկսաւ Պէյրութէն: Չորս հանրակառքերը ուղուեցան դէպի Զահլէ, շուրջ 120 ընկերուհիներ հիւրընկալուեցան «Հայ Կեդրոն»ին մէջ, ԼՕԽ-ի «Շուշի» մասնաճիւղի վարչութեան կողմէ, ուր վարչութեան ատենադպրուհին տեղեկութիւններ տուաւ մասնաճիւղի գործունէութեան մասին:
Երկրորդ այցելութիւնը եղաւ Այնճարի Ս. Պօղոս Եկեղեցին, ուր հոգեւոր հովիւ՝ Տէր Միւռոն Քհն. Աւետիսեան կատարեց Ս. Աստուածածնայ նուիրուած աղօթքներ, ներկաներուն մասնակցութեամբ: Որմէ ետք, մասնակիցներուն առիթ տրուեցաւ յիշատակի նկարներ ունենալու, եկեղեցւոյ և Մուսա Լերան հերոսամարտի յուշարձանի շրջափակին մէջ:
Գրագէտ և խմբագիր՝ Պօղոս Սնապեանի Տուն-Թանգարանին ծանօթացումը չէր կրնար այս ծրագրէն դուրս մնալ: Յանձինս տիկ. Թամար Անտոնեանին, ներկաները տեղեկութիւններ ստացան Սնապեանի կեանքին, նկարագրին ու աշխատանքներուն մասին:
«Աղթամար» մասնաճիւղի կեդրոնին մէջ, սուրճի դադարէ մը ետք խումբը ուղուեցաւ դէպի Ճաշարան «Ռազմիկ»: Ճաշին առընթեր, ընկերուհիները վայելեցին գեղեցիկ բնութիւնը:
ՀՕՄ-ի Կեդրոնական Վարչութեան ներկայացուցիչ ՝ ընկհ. Նելլի Վեքիլեանի ներկայութեամբ, Խօսք առաւ Շրջ. Վարչութեան ատենապետ՝ ընկհ. Մարալ Մխճեան, իմացնելով, թէ Շրջանային Վարչութիւնը վերջին ամիսներուն երկու մեծ ծրագիրներ իրականացուց: Արագածի պարտէզին մէջ ունեցանք արդի մանկապատանեկան գրադարան, իսկ Կազդուրման կայանին մէջ ոտնագնդակի դաշտ: Ընկերուհին շնորհակալութիւն յայտնեց ԼՕԽ-ական ընկերուհիներուն ժրաջան աշխատանքին համար:
Մթնոլորտը աւելի հաճելի դարձաւ, երբ ընկհ. Վիքթորիա Գէորգեան երգեց մօր , համբարձման և հայրենիքին նուիրուած երգեր: ինչպէս նաև ընկհ. Նուշիկ Սէֆէրեան երգեց շարական մը: Ապա փոքրիկն Սեւան Սարգիսեան ասմունքեց մօր նուիրուած քերթուած մը: Հայկական շուրջպարերով, խանդավառ մթնոլորտի մէջ, ընկերուհիները հաճելի ընկերային պահեր ունեցան, պահ մը մոռնալով իրենց ապրած դժուարութիւնները:
Աւարտին, խումբը ներկայ գտնուեցաւ ԼՕԽ-ի «Ալեքսան և Արաքսի Գլպաշեան» կազդուրման կայանի նորակերտ ոտնագնդակի դաշտի բացման արարողութեան:
