Մայիս ամիսը տարբեր խորհուրդ եւ իմաստ ունի հայ ժողովուրդին համար: Գարնանային այս վարդաբոյր ամսուան ընթացքին կը յիշենք մեր պատմութեան յաղթապանծ տարիները, օրերը: Աշխարհի համն ու բոյրը հանդիսացող մայրն ու մայրութիւնը կը փառաւորուին մայիսին` նոյն ատեն փառաւորելով Աստուածամայրը:
Այս գիտակցութեամբ զինուած, ԼՕԽ-ի մասնաճիւղերը մայիս ամսուան ընթացքին տարբեր նախաձեռնութիւններով եւ ձեռնարկներով նշեց նուիրեալ ու թանկարժէք էակներով` մայրերուն տօնը:
«Աստղիկ» Մասնաճիւղ
Երեքշաբթի, 20 մայիս 2014 թուականը տարբեր օր էր ԼՕԽ-ի «Աստղիկ» մասնաճիւղին համար, որ «Պատկեր» ճաշարանին մէջ, ունեցաւ գարնանային մտերմիկ ձեռնարկ մը` հովանաւորութեամբ ԼՕԽ-ի Շրջանային վարչութեան: Ընտանեկան ջերմ մթնոլորտի մէջ ԼՕԽ-ականները յիշատակելի պահեր ապրեցան հայկական երաժշտութեան ընկերակցութեամբ:
ԼՕԽ-ի քայլերգի ունկնդրութենէն ետք մասնաճիւղի ատենապետ Վրէժուհի Փափազեան իր սրտի խօսքը փոխանցեց ներկաներուն` անդրադառնալով մայիս ամսուան յատկանշական օրերուն եւ տօներուն սկսելով Շուշիի ազատագրումէն, Համբարձման եւ Հայաստանի անկախութեան տօներէն` հասնելով մայրերու օրուան: Ան շեշտը դրաւ այն իրողութեան վրայ, որ մայիս ամիսը նուիրուած է հայ մայրերուն եւ ամբողջ տիեզերքի մօր, Մարիամ Աստուածածնին:
Ապա ձեռնարկը ճոխացուցին Ժան Օհաննէսեան` կիթառով եւ Նժդեհ Պոտրումեան` Սայաթ Նովայի աշուղական երգերու մեկնաբանութեամբ:
Մթնոլորտը աւելի ջերմացաւ երբ հնչեցին ժողովրդական եւ ազգագրական երգերը` ներկաներուն մասնակցութեամբ:
Վիճակաձգութենէն ետք ներկաները բարձր տրամադրութեամբ բաժնուեցան իրարմէ, դարձեալ հանդիպելու յոյսով:
