ԼՕԽ-ի «Կարինէ» մասնաճիւղի վարչութիւնը, միշտ նախանձախնդիր համախմբելու իր անդամուհիները, որոշած էր յատուկ աշխատանք տանիլ, իր տարեկան մշակած ծրագրին զուգընթաց , իւրաքանչիւր ամսուան մէջ օր մը հրաւիրել եւ հաւաքել իր գործօն ընկերուհիները սեղանի մը շուրջ, միասնաբար ճաշակելու վարչութեան ընկերուհիներուն պատրաստած համադամ ճաշերն ու անուշեղէնը:
Առաջին հանդիպումը տեղի ունեցաւ ուրբաթ, 11 Մարտ 2016-ին, «Սողոմոն Թեհլիրեան» ակումբի , ԼՕԽ-ի վարչութեան սենեակին մէջ:
Հայկական «Իջ»- ն ու «թահին»-ով անուշեղէնը, որպէս քառասնորդաց շրջանի ծոմապահութեան յարմար ուտելիքներ, գնահատուեցան բոլորին կողմէ:
Տեղի ունեցաւ միտքերու փոխանակում, արծարծուեցան մասնաճիւղի վարչութեան աշխատանքին հետ առնչուող հարցեր:
ԼՕԽ-ի երդիքին տակ , սոյն հանդիպման մտերմիկ մթնոլորտը, հաճելի խօսակցութիւնն ու համեղ ճաշերը կարծես քաջալերած էին բոլորը, առաջարկելու, որ նոյնանման հանդիպումներ յաճախակի կրկնուին եւ յաջորդ հանդիպման թուականը ըլլայ մօտալուտ:
