Ամանորի եւ Ս. Ծննդեան ուրախ տօներուն առիթով, Չորեքշաբթի, 23 Դեկտեմբեր 2015-ին, երեկոյեան ժամը 7:00-ին, ԼՕԽ-ի «Ա. Պուլղուրճեան» Ընկերաբժշկական Կեդրոնի «Թնճուկեան» սրահէն ներս, տեղի ունեցաւ աւանդական Ամանորի խրախճանքը, որ կազմակերպուած էր ԱՊԸԲ Կեդրոնի աշխատանքի խմբակին կողմէ։
Ներկայ էին ՀՕՄ-ի Կեդրոնական Վարչութեան ներկայացուցիչ՝ ընկհ. Նելլի Վեքիլեան, ԼՕԽ-ի Շրջանային Վարչութեան անդամներ, ԱՊԸԲ Կեդրոնի Տնօրէնութիւնը, բժիշկները եւ անձնակազմը, որոնք համախնբուած էին ԼՕԽ-ի երդիքին տակ, միասնաբար մէկ ընտանիքի անդամներու նման, տօնելու եւ խանդավառ ու ջերմ մթնոլորտ մը անցընելու:
Խրախճանքի բացման խօսքը կատարեց տիկի Ցոլեր Մարկոսեանը, որ բարի գալուստ մաղթեց եւ շնորհաւորեց բոլորին Նոր Տարին եւ Ս. Ծնունդը, ապա հրաւիրեց ԼՕԽ-ի Շրջանային Վարչութեան ատենապետուհի՝ ընկհ. Թալին Գըլպաշեանն ու ԱՊԸԲ կեդրոնի տնօրէնուհի՝ Օրդ. Մէյրի Չոլոյեանը, որպէսզի փոխանցեն իրենց սրտի խօսքը: Անոնք յաջորդաբար խաղաղութեան, արեւշատութեան եւ յաջողութեան մաղթանքներ յղեցին եւ յարատեւ վերելք մաղթեցին ԼՕԽ-ի ԱՊԸԲ կեդրոնին:
Ընդառաջելով կազմակերպիչ խմբակի հրաւէրին, հանրածանօթ եւ սիրուած երգչուհի՝ Տիկն. Գարմէն Աճէմեան իր մասնակցութիւնը բերաւ գեղարուեստական յայտագրին, որ հայկական ժողովրդային եւ գաւառական երգերով ճոխացուց մթնոլորտը ։
Խրախճանքի խանդավառութիւնը հասաւ գագաթնակէտին, երբ Կաղանդ Պապուկը, նուէրներու մեծ տոպրակ մը ուսին, ժամանեց սրահ եւ խրախուսեց ներկաները միասնաբար պարելու եւ երգելու: Խրախճանքը շարունակուեցաւ «Քարայոքէ» երգեցողութեամբ մինչեւ ուշ գիշեր։
Ներկաները իրենց բարեմաղթութիւնները փոխանցելով եւ Նոր Տարին վերանորոգուած հոգիով ընդունելու յոյսով բաժնուեցան իրարմէ։
