Կազմակերպութեամբ Լիբանանահայ օգնութեան խաչի Շրջանային վարչութեան առողջապահական յանձնախումբին եւ «Արաքսի Պուլղուրճեան» ընկերաբժշկական կեդրոնի նախազգուշական բաժանմունքին, չորեքշաբթի, 25 փետրուար 2015-ի առաւօտեան ժամը 10:30-ին, կեդրոնի «Թնճուկեան» սրահին մէջ տեղի ունեցաւ դասախօսութիւն` նիւթ ունենալով «Ոտքի ոսկորի հարցեր»-ը, զոր ներկայացուց բեկաբուժ – վիրաբուժ տոքթ. Փետրօ Նախլէ:
Բացման խօսքը առողջապահական յանձնախումբին անունով ներկայացուց Սոնա Եափուճեան: Ան ներկայացնելէ ետք դասախօսը նշեց, թէ ոտքերը մարմնի յենարաններն են: Ոտքի որեւէ տեսակի անհանգստութիւն արգելք կը հանդիսանայ մեր առօրեայ կեանքի հեզասահ ընթացքին:
Տոքթ. Փետրօ Նախլէ դասախօսութեան սկսաւ սահիկներու օժանդակութեամբ բացատրելով ոտքի կառոյցը, ոսկորները, մկանները, յօդակապերը: Ան ոտքը բաժնեց երեք մասի` ետեւի, միջին ու առջեւի մասերը: Նշեց նաեւ, թէ ոտքը մօտաւորապէս 15 ոսկորներէ կը բաղկանայ, ինչպէս նաեւ մկաններէ, յօդակապերէ եւ այլն:
Տոքթ. Փետրօ Նախլէ յաջորդ բաժինով բաւական մանրամասն խօսեցաւ ոտքի յատուկ հարցի մը մասին, որ կը կոչուի (Հալիւքս Վալկիւս):
Հալիւքս կը նշանակէ ոտքի մեծ մատ, բթամատ
Վալկիւս կը նշանակէ ծռիլ, թեքուիլ:
Հետեւաբար ոտքի մեծ մատի, բթամատի դէպի ներս թեքուիլը:
Վերոնշեալ երեւոյթը ունի իր հիմնական պատճառները.
ա- Ժառանգական ազդակը:
բ- Երկար ժամանակ բարձր եւ սրածայր կօշիկներու գործածութիւնը:
գ- Ոտքի կառոյցը, ձեւը:
դ- Ոտքի յատակը տափակ ըլլալու պարագան կը նկատուի Հալիւքս Վալկիւս վիճակի յայտնուիլը:
Այս բաժինով պէտք է նկատի ունենալ այն կացութիւնը, թէ ոտքի մատներու կառոյցը կը նպաստէՀալիւքս Վալկիւսի զարգացման: Եթէ պարագան ի ծնէ այդպէս է, ատիկա կը զարգանայ 20-25 տարեկանի միջեւ, իսկ երբ աւելի ուշ, 60 տարեկանէն վերջ:
Տոքթ. Փետրօ Նախլէ բացատրեց, թէ ինչպէ՛ս եւ ի՛նչ ընթացքով ոտքի բթամատը կը թեքուի եւ ի՛նչ աստիճանի ու տարողութեան կը հասնի կացութիւնը:
Ի՞նչ են ախտանշանները.- Ոտքի բթամատի թեքուիլը, սուր ցաւ, տարբեր բորբոքումներու առկայութիւնը, կոշտուքներու յայտնուիլը եւ բազմացումը:
Հալիւքս Վալկիւսի բուժման մասին խօսելով` բժիշկը հարցը բաժնեց գլխաւոր երկու ուղղութեան:
Առաջին.- Յարաբերաբար այս կը նպաստէ բթամատի աւելի դանդաղ թեքումին, ու դադրեցման, բայց ոչ վերջնական բուժման:
Շուտով դադրեցնել բարձր կօշիկներու օգտագործումը:
Գործածել յատուկ կազմածներ որոնք կը նպաստեն ոտքի ընդհանուր ճնշումի տարածման ու հաւասարակշռութեան:
Երկրորդ.- Այս ուղղութիւնը վերջնականապէս կը բուժէ եւ կը լուծէ ոտքի բթամատի թեքումը: Գործողութեամբ կարելի է դադրեցնել եւ ուղղել ոտքի մատները:
Տոքթ. Փետրօ Նախլէ նաեւ ներկայացուց այլ ոտքի ոսկորներու հարցեր, անոնց պատճառները, ախտանշանները, բուժման միջոցները:
Աւարտին դասախօսը տարբեր օրինակներով ու բացատրութիւններով պատասխանեց ներկաներու հարցումներուն:
