Կազմակերպութեամբ Լիբանանահայ օգնութեան խաչի Շրջանային վարչութեան առողջապահական յանձնախումբին եւ «Արաքսի Պուլղուրճեան» ընկերաբժշկական կեդրոնի նախազգուշական բաժանմունքին, չորեքշաբթի, 4 մարտ 2015-ի առաւօտեան ժամը 10:30-ին, կեդրոնի «Թնճուկեան» սրահին մէջ տեղի ունեցաւ դասախօսութիւն` «Մարսողական դժուարութիւններ» նիւթով, զոր ներկայացուց վիրաբուժ տոքթ. Զարեհ Մալճեան:
Առողջապահական յանձնախումբին անունով բացման խօսքը ներկայացուց Սոնա Եափուճեան: Ան ներկայացնելէ ետք օրուան դասախօսը նշեց, որ մարսողական դժուարութիւնները կամ անհանգստութիւնները զանազան տեսակի են: Անոնք յաճախ կ՛արտայայտուին փսխուքի, որկորի այրուածքի, կազի արտադրութեան, խիթի, փորի ցաւի եւ փքուռոյց անմարսողութեան եւ այլ ձեւերով:
Տոքթ. Զարեհ Մալճեան դասախօսութեան սկսաւ ներկայացնելով մարսողական համակարգը, որ կը սկսի բերանի բացուածքով` հասնելով մինչեւ սրբան:
Անմարսողութիւնը առողջական անհանգիստ վիճակ մըն է, բայց հիւանդութիւն չէ, անիկա զանազան հիւանդութիւններու արդիւնք կրնայ ըլլալ կամ անոնց ընկերակցող երեւոյթ մը:
Ի՞նչ են ախտանշանները անմարսողութեան:
- Տաքութիւն, այրուածք, ցաւ\
- Անհանգիստ զգացում, ուռած զգալ
- Սրտխառնուք
- Անմարսողութիւն եւ որկորի այրուածք, որոնք տարբեր անհանգստութիւններ չեն:
Շարունակելով դասախօսութիւնը` տոքթ. Զարեհ Մալճեան ներկայացուց շարք մը բացատրութիւններ` իբրեւ անմարսողութեան պատճառներ: Սրտի հարցերը կամ անմարսողութիւնը իրարու հետ հազուագիւտ կը պատահին:
- Ալքոլի բարձր համեմատութեամբ գործածութիւնը, յատկապէս անօթի փորով:
- Սուր համեմունքով ճաշեր, բարձր համեմատութեամբ իւղով ճաշեր:
- Շատ ուտելը:
- Արագ ուտելը:
- Երբ ջղային վիճակ կայ անհատին մօտ:
- Բարձր համեմատութեամբ մանրաթել պարունակող ճաշեր:
- Ծխախոտը
- Բարձր քանակութեամբ սուրճի օգտագործումը:
Անմարսողութեան պատճառներուն շարքը շարունակելով` տոքթ. Զարեհ Մալճեան թուեց նաեւ հետեւեալները.
- Լեղուցքի քարերը:
- Երբ ստամոքսի ներքին մասը կը բորբոքի:
- Երբ ենթաստամոքսային գեղձը (փանքրէաս) անհանգիստ է:
- Երբ ստամոքսին կամ աղիքին մէջ կան վէրքեր, խոցեր:
- Ասփիրինի կամ հակաբորբոքումի դեղերու գործածութիւնը:
Ինչպէ՞ս կարելի է բարելաւել անմարսողութեան վիճակը:
- Ճաշը ուտելու բաւարար ժամանակ տրամադրելով:
- Ուշադրութեամբ եւ ամբողջութեամբ ծամել ճաշը:
- Ճաշի ընթացքին չվիճաբանիլ կամ չջղագրգռուիլ:
- Ճաշի աւարտին մարզանք չկատարել:
Տոքթ. Զարեհ Մալճեան խօսեցաւ նաեւ մարսողութեան հոլովոյթին նպաստող տարբեր դեղերու գործածութեան եւ տեսակներուն մասին:
Ե՞րբ դիմել բժիշկին:
- Երբ անմարսողութիւնը կը տեւէ մէկ շաբաթէ աւելի:
- Երբ ենթակային կշիռքը կը նուազի:
- Երբ կը յայտնուի յանկարծակի փորի ցաւ:
- Երբ հիւանդը ունի կլլելու դժուարութիւն եւ անիկա աստիճանաբար կը զարգանայ:
Աւարտին տոքթ. Զարեհ Մալճեան տարբեր օրինակներով եւ լուսաբանութիւններով պատասխանեց ներկաներուն հարցումներուն:
