Կազմակերպութեամբ Լիբանանահայ օգնութեան խաչի Շրջանային վարչութեան առողջապահական յանձնախումբին եւ «Արաքսի Պուլղուրճեան» ընկերաբժշկական կեդրոնի նախազգուշական բաժանմունքին, չորեքշաբթի, 3 փետրուար 2016-ին, առաւօտեան ժամը 10:00-ին, կեդրոնի «Թնճուկեան» սրահին մէջ տեղի ունեցաւ «Հոգեֆիզիքական հիւանդութիւններ» նիւթով դասախօսութիւնը, զոր ներկայացուց հոգեբուժ տոքթ. Ժան Քլոտ Եազպեք:
Առողջապահական յանձնախումբին անունով բացման խօսքը ներկայացուց Վերժին Խորշիտեան: Ան ներկայացնելէ ետք օրուան դասախօսը նշեց, որ հոգեֆիզիքական հիւանդութիւնները յաճախ բոլորիս պատահող, յատկապէս տարեցներու ու փոքրերու պարագային ուշագրաւ երեւոյթ է:
Տոքթ. Ժան Քլոտ Եազպեք դասախօսութեան սկսաւ բացատրելով հոգեֆիզիքական հիւանդութիւնը, ուր անհատի ֆիզիքական եւ հոգեկան ազդակները փոխազդուելով պատճառ կը դառնան զանազան հիւանդութիւններու, որոնք յաճախ կ՛ունենան ֆիզիքական-առողջապահական տուեալներ, բայց նաեւ հոգեբանական ազդակներ:
Յաճախ անհատի բժշկական, ինչպէս նաեւ զանազան ախտաճանաչման քննութիւններու ենթարկուելով հանդերձ, ոչ մէկ հիմնաւորում կը հաստատուի անոր հիւանդութեան ֆիզիքական առկայութեան:
Վերոնշեալ ֆիզիքական վիճակը անուղղակիօրէն ցոյց կու տայ, թէ ենթական կը տառապի հոգեկան ընկճուածութենէ, որուն արդիւնք են զանազան մարմնային ցաւեր ու անհանգստութիւններ:
Հոգեբուժը թուեց այն ազդակները, որոնք կը նպաստեն հոգեֆիզիքական զանազան հիւանդութիւններու:
1- Ժառանգական եւ կենսաբանական ազդակները,
2- Անցեալի, մանկութեան հետ առնչուած զանազան փորձառութիւնները,
3- Անհատի դաստիարակչական ազդակը,
4- Զանազան մշակոյթները, ընկերային պայմանները եւ օրէնքները, կենսաձեւերը կը ստեղծեն ազդակներ, որոնք առաւել կամ նուազ կ՛ազդեն հոգեֆիզիքական հիւանդութիւններու զարգացման:
Տոքթ. Ժան Քլոտ Եազպեք յաջորդաբար նշեց երեք հոգեֆիզիքական հիւանդութիւններ:
1- Սոմաթիկ համակարգի խանգարում.- Անհատը շարունակաբար կը գանգատի ցաւերէ, որոնց հիմքը կը կազմէ հոգեկան անհանգստութիւնը, որ յաճախ կը դրսեւորուի շատ տարօրինակ ձեւերով: Ենթական ցաւերու կողքին կը թուէ նաեւ յոգնածութիւնը, որոնք իրեն համար շատ «հարազատ» են, թէեւ բժշկականօրէն չունին որեւէ հաստատում:
Այս վիճակը կրնայ ժամանակի ընթացքին զարգանալ եւ անհատին կեանքին կեդրոնական, շարունակական մտահոգութիւնը դառնալ, ուր յաճախ հոգեկան ընկճուածութեան պայմաններու տակ ատիկա կը ստանայ շատ աւելի ծանր վիճակներ:
2- Դարձի խանգարում (Քոնվըրժըն).- Այս հոգեֆիզիքական խանգարումը յաճախ արդիւնք է յանկարծակի անակնկալ պատահարի մը, որ շատ ծանր ազդելով ենթակային հոգեկանին վրայ, իր ֆիզիքական դրսեւորումը կ՛ունենայ, երբ անհատը յանկարծ կը դադրի խօսելէ, լսելէ, տեսնելէ, կամ լուսնոտութենէ տառապողի նման ախտանշաններէ կը տառապի: Ժամանակ մը ետք աստիճանաբար անհատը կրնայ վերադառնալ իր անցեալի բնականոն վիճակին:
3- Շինծու խանգարում.- Այս պարագան կը յատկանշուի զանազան հոգեֆիզիքական վիճակներով: Անհատը կրնայ ստեղծել եւ վերագրել իր անձին հիւանդութիւն մը, օրինակ` երբ ընտանիքին մէջ կայ շաքարախտի պարագայ մը, անհատը ազդուելով այս վիճակէն ինքզինք կը ներկայացնէ իբրեւ «շաքարախտաւոր»: Ան դիմելով շաքարախտի դեղերու օգտագործման, կ՛ունենայ ծանր հետեւանքներ:
Աւարտին տոքթ. Ժան Քլոտ Եազպեք զանազան օրինակներով եւ բացատրութիւններով պատասխանեց ներկաներուն հարցումներուն:
