Լիբանանահայ Օգնութեան Խաչի շրջանային վարչութեան առողջապահական յանձնախումբն ու «Արաքսի Պուլղուրճեան» ընկերաբժշկական կեդրոնի նախազգուշական բաժանմունքը միասնաբար վերսկսան ներկայացնել առողջապահական բնոյթ ունեցող դասախօսութիւններու նոր շարք մը, որ պիտի երկարի մինչեւ Մայիս 2018:
Չորեքշաբթի, 5 Հոկտեմբեր 2017-ին, առաւօտեան ժամը 10:30-ին, ԼՕԽ-ի «Արաքսի Պուլղուրճեան» ընկերաբժշկական կեդրոնի «Թնճուկեան» սրահին մէջ տեղի ունեցաւ շարքին առաջին դասախօսութիւնը, որու նիւթն էր «Հիւանդի Խնամք»ը, զոր ներկայացուց հիւանդապահուհի Գարոլ Դերձակեան:
Առողջապահական յանձնախումբին անունով բացման խօսքը արտասանեց տոքթ. Սիրուն Վարդապետեան, որ բարի գալուստ մաղթելէ ետք ներկաներուն, անդրադաձաւ սոյն դասախօսական շարքի նպատակին մասին, ապա ներկայացուց օրուան դասախօսն ու դասախօսութեան նիւթը: Ան նշեց, որ բոլորս կը գործածենք զանազան տեսակի դեղեր տարբեր հիւանդութիւններ դարմանելու համար, ուստի այս դասախօսութեամբ պիտի իմանանք, թէ ինչպէ՞ս, ե՞րբ եւ ի՞նչ ճշգրտութեամբ կարելի է օգտագործել դեղերը, առաւելագոյն չափով օգտուելու անոնց բարիքներէն:
Գարոլ Դերձակեան դասախօսութեան սկսաւ ըսելով, թէ դեղերու գործածութիւնը մեր կեանքին կարեւոր մէկ մասը կը կազմէ այսօր: Ան նշեց, թէ հիւանդը պարտի կատարել բժիշկին թելադրանքները, դեղերը hետեւողական ձեւով, ճշգրտօրէն եւ ամէն օր նոյն ժամուն օգտագործել:
Դասախօսուհին գործնական օրինակներով բացատրութիւններ տուաւ, թէ ի՞նչ դասաւորում կարելի է ընել երբ հիւանդը մոռցած է դեղը առնել:
Շարունակելով, ան նկատել տուաւ, թէ տարիքի յառաջացման հետ դեղերու գործածութիւնը կրնայ աւելնալ, յատկապէս քրոնիկ հիւանդութիւններու պարագային եւ փոխանցեց շարք մը թելադրանքներ:
ա-Հետեւիլ բժիշկին ցուցմունքներուն եւ դեղը գործածել ճիշդ ձեւով:
բ-Դեղերու օգտագործումը ըլլայ բժիշկին թելադրութեամբ եւ ոչ դրացիին կամ բարեկամին:
գ-Ունենալ դեղերու յատուկ տուփիկներ, որոնց մէջ նախապէս օրուան մը կամ շաբթուան մը դեղերը զետեղել եւ ապահովել դեղերու օրինաւոր եւ շարունակաբար գործածութիւնը:
դ-Դեղահատերը առնել բաժակ մը ջուրով եւ ո՛չ պտուղի հիւթով կամ կազային ըմպելիներով:
ե-Դեղերու բազմազանութեան պարագային, իւրաքանչիւր դեղի միջեւ ձգել որոշ ժամանակամիջոց մը:(նուազագոյնը 10 վայրկեան)
Հոկտեմբեր 1-ը սուրճի միջազգային օրն ըլլալով, դասախօսուհին անդրադարձաւ նաեւ սուրճի թ՛է օգտակարութեան եւ թ՛է անոր ժխտական ազդեցութեան մեր մարմնի calcium-ին վրայ:
Աւարտին, ան բացատրութիւններով ու օրինակներով պատասխանեց ներկաներու հարցումներուն:
