Կազմակերպութեամբ Լիբանանահայ օգնութեան խաչի առողջապահական յանձնախումբին եւ «Արաքսի Պուլղուրճեան» ընկերաբժշկական կեդրոնի նախազգուշական բաժանմունքին, չորեքշաբթի, 15 հոկտեմբեր 2015-ին, առաւօտեան ժամը 10:00-ին, կեդրոնի «Թնճուկեան» սրահին մէջ տեղի ունեցաւ «Առողջ Ընտանիքի Նախապայմաները» նիւթով դասախօսութիւն մը, զոր ներկայացուց Պէյրութի ամերիկեան համալսարանի դասախօս Մէյրի Արեւեան:
Առողջապահական յանձնախումբին անունով բացման խօսքը ներկայացուց ատենապետ Սոնա Եափուճեան: Ան ներկայացնելէ ետք դասախօսը նշեց, որ ասիկա 2015-2016 տարեշրջանի առաջին դասախօսութիւնն է, որ նուիրուած է ընտանեկան առողջութեան: Ան բացատրեց, թէ ընտանիքը ընկերութեան հիմնաքարն է: Իսկ ամուր եւ առողջ հայ ընտանիքը հայ ազգի գոյատեւման գրաւականն է:
Մէյրի Արեւեան դասախօսութեան սկսաւ` բացատրելով, թէ իւրաքանչիւր ընտանիք ունի իր զօրութիւնները եւ տկարութիւնները: Ընտանեկան զօրութիւնները կը նկատուին այն ազդակները, որոնք կը սատարեն ընտանիքի միութեան եւ համերաշխութեան, եւ կը նպաստեն ընտանիքի կարողութիւններուն զարգացման:
Ընտանիքը յաճախ կը դիմագրաւէ ոչ յաջող ակնկալութիւններ, որոնք արդիւնք են,
ա- Ամուսնական կեանքի մասին մեր ունեցած համոզումին,
բ- Այն սխալ կարծիքին, թէ կեանքը պէտք է միշտ արդար ըլլայ,
գ- Ընտանիքին անդամները միշտ առողջ պիտի ըլլան:
Ի՞նչ են սխալ ենթադրութիւնները ամուսնութեան մասին:
Լէյտըրըր եւ Ժաքսըն (1968) մատնանշած են եօթը սխալ ենթադրութիւններ.
1- Ենթադրաբար, զոյգեր կ՛ամուսնանան, որովհետեւ կը սիրեն զիրար:
2- Բազմաթիւ ամուսնացած զոյգեր կը սիրեն զիրար
3- Ռոմանթիք սէրը կարեւոր է գոհացուցիչ ամուսնութեան համար
4- Կարծիքներու եւ վերաբերմունքի հսկայ տարբերութիւններ կան այրերու եւ կիներու միջեւ` յաճախ դուռ բանալով ամուսնական դժուարութիւններու: Ճկունութիւնը բանալին է յաջող ամուսնութեան:
5- Ենթադրելով, թէ զաւակ ունենալը կը բարելաւէ խնդրայարոյց ամուսնութիւն մը:
6- Առանձնութեան զգացումը կը դարմանուի ամուսնութեամբ:
7- Բարկութեան դրսեւորումը զոյգերէն մէկուն կողմէ միւսին հանդէպ` ամուսնութիւնը կ՛առաջնորդէ ձախողութեան:
Շարունակելով դասախօսութիւնը` Մէյրի Արեւեան ներկայացուց չորս միջոցներ, որոնք օգտակար կ՛ըլլան դարմանելու կեանքի դժուարութիւններէն յառաջացած ցաւերը
Տեք կ՛առաջարկէ.
1- Քմահաճոյքներու յետաձգում,
2- Պատասխանատուութեան ընդունում,
3- Նուիրուածութիւն` իրականութեան հանդէպ,
4- Հաւասարակշռութիւն:
Որո՞նք են ընտանիքի զօրութեանց չափանիշները:
1- Կարենալ հոգալ ընտանիքի Ֆիզիքական, զգացական, եւ հոգեկան կարիքները
2- Զգալ ընտանիքի միւս անդամներուն հետ
3- Փոխյարաբերութիւններ մշակել ազդեցիկօրէն:
4- Ապահովութիւն, պաշտպանութիւն եւ քաջալերանք ներշնչել,
5- Ընկերային պատասխանատու յարաբերութիւններ մշակել դրացիներու, դպրոցի եւ շրջանի հետ,
6- Աճիլ ու մեծնալ զաւակներուն հետ եւ անոնց միջոցով,
7- Օրէնքները գործադրել ճկունութեամբ,
8- Օգնել իր անձին եւ ընդունիլ օժանդակութիւն` երբ պէտք է,
9- Փոխադարձ յարգանք ունենալ ընտանիքի միւս անդամներուն անձնական կեանքին նկատմամբ,
10- Նախկին դժուարին փորձառութիւնները օգտագործել իբրեւ միջոց բարեփոխման եւ զարգացման,
11- Հոգածութիւն ցուցաբերել միջընտանեկան գործակցութեան, հաւատարմութեան եւ միասնականութեան հանդէպ:
Իբրեւ եզրակացութիւն, դասախօսը ներկայացուց հետեւեալը, բոլոր ընտանիքները ունին իրեց զօրութիւններն ու տկարութիւնները : Անհրաժեշտ է ճանչնալ եւ օգտագործել զօրութիւնները դարմանելու համար տկարութիւնները:
Հաշտ, համերաշխ, ուրախ եւ առողջ ընտանիքի նախապայմանը փոխզիջումն է: Անձնական քմայքները պէտք է մէկդի դնել ու նուիրուիլ ընտանիքի բարօրութեան:
Աւարտին Մէյրի Արեւեան զանազան օրինակներով ու բացատրութիւններով պատասխանեց ներկաներու հարցումներուն:
