Հովանաւորութեամբ ԼՕԽ-ի Շրջանային վարչութեան, կազմակերպութեամբ «Վարդուհի Տէկիրմենճեան» խոհանոցի յանձնախումբերուն, հինգշաբթի, 22 դեկտեմբեր 2016-ին, կէսօրուան ժամը 11:00-ին, «Արաքսի Պուլղուրճեան» ընկերաբժշկական կեդրոնի «Թնճուկեան» սրահին մէջ «Վարդուհի Տէկիրմենճեան» խոհանոցի եւ «Եոլանտ Քերոբեան-Ճոմպալաքեան» Սրտի ճաշարանի ծերունիները միասնաբար տօնեցին իրենց Նոր տարին եւ ուրախ ժամեր անցուցին:
Ձեռնարկին ներկայ էին ՀՕՄ-ի Կեդրոնական վարչութեան անդամ Նելլի Վէքիլեան, որ միաժամանակ կը ներկայացնէր Պուրճ Համուտի քաղաքապետութիւնը, Շրջանային վարչութեան ատենապետ Մարալ Մխճեան, յանձնախումբի ներկայացուցիչ Սօսի Արամեան, բարերար Պերճ Կիւլպէնկեան եւ ԼՕԽ-ականներ:
Ուշագրաւ երեւոյթ էր տարեց սերունդի մամիկներուն ու պապիկներուն հանդէպ յանձնախումբին ցուցաբերած մօտեցումն ու գուրգուրանքը: Ձեռնարկին հրամցուած ճաշերը պատրաստուած էին խոհանոցի յանձնախումբի ընկերուհիներուն կողմէ:
Բացման խօսքով հանդէս եկաւ Փաթիլ Մկրտիչեան, որ ներկայացուց խոհանոցի գործունէութիւնը եւ գնահատեց տարուած բծախնդիր աշխատանքը ու բարի վայելում մաղթեց ներկաներուն, ինչպէս նաեւ կատարեց ձեռնարկին հանդիսավարութիւնը:
Մամիկներն ու պապիկները երգեցին եւ հայկական շուրջպար բռնեցին` վայելելով տօնական ու մտերմիկ մթնոլորտը:
Ձեռնարկին` Կաղանդ մամիկին ժամանումը աւելիով խանդավառեց մթնոլորտը. ան բոլորին բաժնեց արժէքաւոր նուէրներ, որոնք տրամադրուած էին Պուրճ Համուտի քաղաքապետութեան կողմէ:
Տարեցները բարեմաղթութիւններ փոխանակեցին իրարու եւ վկայեցին, թէ ԼՕԽ-ի մէջ իրենց հանդէպ ցուցաբերուած գուրգուրանքն ու վերաբերմունքը այլ տեղ կարելի չէ գտնել:
Հաւաքոյթի աւարտին բոլորը գոհունակութեամբ բաժնուեցան իրարմէ:
Վարձքը կատար ձեռնարկին յաջողութեան ի նպաստ գործող բոլոր նուիրատուներուն եւ կամաւոր ընկերուհիներուն:
