ԼՕԽ-ի «Գայեանէ» մասնաճիւղի վարչութեան կազմակերպութեամբ, գարնանային եղանակի եւ Մեծ Պահոց Միջինքի առիթով ձեռնարկը տեղի ունեցաւ հինգշաբթի, 7 ապրիլ 2011-ին, Պէյթ Գօգօ շրջանի Շաքարեաններուն շէնքին մէջ:
Բարի գալուստի խօսքը արտասանեց վարչութեան ատենապետ Սօսի Մանուէլեան. ան շնորհակալութիւն յայտնեց ներկաներուն` իրենց քաջալերանքին եւ մասնակցութեան համար, ինչպէս նաեւ` բոլոր անոնց, որոնք սիրայօժար եւ կամովին տրամադրած էին ձեռնարկին պահքի յատուկ ճաշերը: Ապա հրաւիրեց Սեւան Կարապետեան-Ադամեանը` վարելու ձեռնարկը: Ս. Ադամեան իր կարգին գնահատեց վարչութեան աշխատանքը եւ յաւուր պատշաճի փոխանցեց տեղեկութիւններ` միջինքի սովորութիւններուն եւ աւանդութիւններուն մասին: Ինչպէս նաեւ խանդավառ մթնոլորտ ստեղծեց մեկնաբանելով տոհմիկ եւ էսդրատային երգեր, որոնց մասնակցեցան նաեւ ներկաները:
Հաճելի մթնոլորտի մէջ ընթացաւ ձեռնարկը, տեղի ունեցաւ նաեւ վիճակահանութիւն: Ներկաները մեկնեցան լաւ տրամադրութեամբ` իւրաքանչիւրը իրեն հետ տանելով Պուրճ Համուտի քաղաքապետութեան կողմէ տրամադրուած գարնանային ծաղիկներով թաղարներ: