ԼՕԽ-ի «Հայաշէն» մասնաճիւղի վարչութեան կազմակերպած, 2016-2017 տարեշրջանի առաջին ձեռնարկը տեղի ունեցաւ Երեքշաբթի, 8 Նոյեմբեր 2016-ին, Հայաշէնի ժողովրդային տան սրահին մէջ, ներկայութեամբ ԼՕԽ-ի Շրջանային Վարչութեան ներկայացուցիչ՝ ընկհ. Իսկուհի Գաբլանեանին, կազմակերպչական յանձնախումբի ներկայացուցիչ՝ ընկհ. Մարկօ Կոտալազեանին, ԼՕԽ-ի «Կարս» մասնաճիւղի ներկայացուցիչ ընկերուհիներուն, հիւրերու, ԼՕԽ-ական ընկերուհիներու եւ թաղեցիներու:
ԼՕԽ-ի քայլերգը ունկնդրելէն ետք, մասնաճիւղի վարչութեան ատենապետուհի՝ ընկհ. Շաքէ Պաղտասարեան, բարի գալուստ մաղթեց ներկաներուն, շնորհակալութիւն յայտնեց անոնց եւ ըսաւ.- «Ձեր ներկայութիւնն ու քաջալերանքը կը գօտեպնդեն եւ ուժ ու կորով կը ներշնչեն մեզի»: Ան աւելցուց ըսելով, «տարուէ-տարի կը բազմանան կրթական, առողջապահական եւ ընկերային պարագաները, որոնց համար ԼՕԽ-ը իր քսակը բանալով, իր կարողութեան սահմաններուն մէջ, կը հասնի բոլորին»:
Վարչութիւնը, ձեռնարկին տարբեր բնոյթ տալու նպատակով, յարմար նկատած էր լսա-տեսողական միջոցներով, Հայաստանի տեսարժան վայրերը ներկայացնել ներկաներուն: Առ այդ, ընկհ.Պաղտասարեան համադրած եւ պատրաստած էր տեղեկութիւններ եւ նկարներ՝ վանքերու, կոթողներու, յուշահամալիրներու, թանգարաններու եւ գեղատեսիլ վայրերու մասին:
Ներկաները մեծ հետաքրքրութեամբ դիտեցին, ծանօթացան եւ հետեւեցան ներկայացուած տեղեկութիւններուն, մաղթելով, որ այլ առիթներով եւս ծանօթանան տարբեր տեսարժան վայրերու:
Ճաշի հիւրասիրութենէն ետք, տեղի ունեցան վիճակաձգութիւն եւ նուիրատուութիւններ: Ներկաները բարձր տրամադրութեամբ մեկնեցան սրահէն:
