Մայիս ամիսը տարբեր խորհուրդ եւ իմաստ ունի հայ ժողովուրդին համար: Գարնանային այս վարդաբոյր ամսուան ընթացքին կը յիշենք մեր պատմութեան յաղթապանծ տարիները, օրերը: Աշխարհի համն ու բոյրը հանդիսացող մայրն ու մայրութիւնը կը փառաւորուին մայիսին` նոյն ատեն փառաւորելով Աստուածամայրը:
Այս գիտակցութեամբ զինուած, ԼՕԽ-ի մասնաճիւղերը մայիս ամսուան ընթացքին տարբեր նախաձեռնութիւններով եւ ձեռնարկներով նշեց նուիրեալ ու թանկարժէք էակներով` մայրերուն տօնը:
ԼՕԽ-ի «Արազ» մասնաճիւղի մայրերու օրուան ձեռնարկը տեղի ունեցաւ 15 մայիս 2014-ին «Պուզըր» ճաշարանին մէջ, ներկայութեամբ շրջանի ԼՕԽ-ականներու, քոյր մասնաճիւղերու եւ ԼՕԽ-ի բարեկամներուն: Բացման խօսքին մէջ մասնաճիւղի ատենապետ Արշօ Կարապետեան ողջունեց ներկաները` լուսարձակի տակ առնելով հայ մօր առաքելութիւնը` ընտանիքի մէջ եւ ազգային մակարդակի վրայ. ան դիտել տուաւ, որ այդ նուիրումով տարիներ շարունակ հայ ազգը մնացած է կանգուն եւ պահած է իր դիմագիծը: գեղարուեստական յայտագրի ընդմէջէն խօսք առաւ շրջանի երիցագոյն ընկերուհի` Մանուշակ Քէշիշեանը` ընթերցելով Մեսրոպ Մաշտոցի, Պարոյր Սեւակի եւ մօր նուիրուած այլ խօսքեր: Ապա մաղթեց, որ հայ մայրը Աստուծոյ շնորհքով մնայ իր առաքելութեան մէջ եւ պահէ իր ընտանիքը հայկական մթնոլորտով:
Ձեռնարկին ընթացքին տեղի ունեցան նուիրատուութիւններ: