«Կիներու միջազգային օր»ուան առիթով ԼՕԽ-ի «Աստղիկ» մասնաճիւղի վարչութիւնը կազմակերպեց ձեռնարկ մը, որ տեղի ունեցաւ կիրակի, 6 մարտ 2011-ին, կէսօրուան ժամը 12:00-էն սկսեալ «Սատեր» ճաշարանին մէջ:
ԼՕԽ-ի քայլերգի ունկնդրութենէն ետք վարչութեան ատենապետ Վրէժուհի Փափազեան հակիրճ ձեւով պատմականը փոխանցեց «Կիներու միջազգային օրուան» մասին` շեշտը դնելով, հայ կնոջ դերակատարութեան վրայ: Ան ըսաւ, թէ հայ կինը շնորհիւ իր ողջմտութեան, պաշտպանն է ընտանիքին հոգեւոր եւ մտաւոր դաստիարակութեան, անտեսելով դժուարութիւնները` նպաստած է եւ կը շարունակէ նպաստել հայ ազգին գոյատեւման, տէր կանգնելով հայ մշակոյթին, հայ աւանդութեան` սատար կը կանգնի, այր մարդոց, կառչած կը մնայ հայոց լեզուին ու պատմութեան:
Օրը կը զուգադիպէր բարեկենդանին, ուստի Վ. Փափազեան անդրադարձաւ նաեւ ժողովրդական մեր այս աւանդութեան` նշելով, որ «կեր ու խումի» օր է, որովհետեւ յաջորդ օրն իսկ կը սկսի Մեծ պահքը:
Ուսուցչաց տօնին նախօրեակը նկատի ունենալով` Վ. Փափազեան կորով եւ համբերութիւն մաղթեց բոլոր ուսուցիչներուն` շարունակելու համար իրենց վստահուած առաքելութիւնը:
Վիճակաձգութենէն ետք տեղի ունեցաւ օրուան իմաստը խորհրդանշող կարկանդակին հատումը` ամէնէն տարեց եւ ամէնէն երիտասարդ տիկիններուն կողմէ:
Հաճելի եւ ջերմ մթնոլորտ ապրելէ ետք, ներկաները ուրախ տրամադրութեամբ մեկնեցան սրահէն:
