ԼՕԽ-ի «Կարինէ» մասնաճիւղը 11 ապրիլ 2011-ին կայացուց Ամանոսի «Ս. Թեհլիրեան» ակումբին մէջ առողջապահական արշաւ` հովանաւորութեամբ ԼՕԽ-ի Շրջանային վարչութեան եւ գործակցաբար ԼՕԽ-ի «Արաքսի Պուլղուրճեան» կեդրոնի յանձնախումբին առողջապահական յանձնախումբին եւ նախազգուշական բաժանմունքին: Այս արշաւին նպատակն էր հանգանակութեան շրջանին ժողովուրդին, յատկապէս շրջանի հայ բնակիչներուն ծանօթացնել ԼՕԽ-ի գործունէութիւնը, աշխատանքը, ԼՕԽ-ի «Արաքսի Պուլղուրճեան» ընկերաբժշկական կեդրոնի բաժանմունքներու բարիքները, ԼՕԽ-ի Շրջանային վարչութեան գործունէութիւնը, ծրագիրները եւ մասնաճիւղի տարուան ծրագիրը:
Մասնաճիւղի ատենապետ Ալին Արոյեան շնորհակալութիւն յայտնեց ներկաներուն, որոնք յաճախ ներկայ կ՛ըլլան մասնաճիւղին զանազան ձեռնարկներուն եւ կը քաջալերեն զանոնք:
Ապա Ա. Արոյեան ներկայացուց այս արշաւին նպատակը` հասնիլ բոլորին:
Ան նաեւ յայտնեց, որ այս ձեռնարկը կը նպատակադրէ ցոյց տալ հանրութեան եւ հաստատել այն նշանաբանը, որ ԼՕԽ-ը կը գործէ ժողովուրդին համար:
Արշաւի առաջին բաժինով ներկաներուն ներկայացուեցաւ «Առողջութեան» ոսկի գանձին մասին կարեւոր գիտելիքներ` առողջապահական յանձնախուբի անդամ, «Կարինէ» մասնաճիւղի անդամ տոքթ. Սիրուն Վարդապետեանի կողմէ:
Ս. Վարդապետեան ըսաւ, թէ ԼՕԽ-ի Շրջանային վարչութիւնը 26 մասնաճիւղերու ընկերուհիներով, մարդասիրական ծառայութեան կողքին, կը միտի դաստիարակչական գիտելիքներ փոխանցել եւ հարստացնել ներկաներուն միտքերը:
Օր. Սիրուն Վարդապետեան աւելցուց, թէ մեր առողջութիւնը կը վնասուի, եթէ պէտք եղած ցուցմունքներուն չհետեւինք:
Պէտք է ուշադիր ըլլանք ոգելիցին, ծխախոտին վնասներուն, որոնք ոչ միայն անձին, նաեւ շուրջիններուն անհանգստութիւն կը պատճառեն: Ս. Վարդապետեան ըսաւ, թէ անբաւարար սնունդը եւ գերսննդառութիւնը պէտք է ըլլան, մեր դասախօսութեան յաջորդ կարեւոր կէտերը:
Ըստ անոր, մեր ճաշացուցակը հարուստ պէտք է ըլլայ բանջարեղէններով, կաթնեղէններով, ընդեղէններով եւ հեռու մնանք ֆասթ ֆուտէն: «Մեր ճաշի որակը եւ քանակը մեզի առողջութիւն կը պարգեւեն, եւ օրուան ընթացքին ջուրը պէտք է ըլլայ մեր անբաժան ընկերը:
Ապականած օդը նաեւ մեզի անհանգստութիւն կը պատճառէ, աւելցուց Ս. Վարդապետեան յայտնելով, որ մաքուր օդը նաեւ կ՛ազդէ մեր յիշողութեան:
Ապա ԼՕԽ-ի «Արաքսի Պուլղուրճեան» կեդրոնի բժիշկներ Ազնիւ, Մանօ եւ Յարութիւն Այնթէպլեան իւրաքանչիւր արշաւի մասնակիցի փոխանցեցին ցուցմունքներ եւ պատասխանեցին անոնց հարցումներուն եւ անոնց ծանրութեան ու հասակին համեմատ որոշ ուղղութիւններ ներկայացուցին: Յայտնենք, որ նկատելի էր ներկայութիւնը տարբեր տարիքի անհատներու` երիտասարդ, միջին տարիքի ու տարեցներ, որոնք գնահատեցին այս աշխատանքը եւ ուժ ու կորով մաղթեցին ԼՕԽ-ականներուն:
Ներկաները դիտեցին ԼՕԽ-ի կեդրոնին մասին խտասալիկը, ապա տեղի ունեցաւ հիւրասիրութիւն:Յատուկ շնորհակալութիւն` ԼՕԽ-ի Շրջանային Վարչութեան ԼՕԽ-ի «Արաքսի Պուլղուրճեան» ընկերաբժշկական կեդրոնի առողջապահական յանձնախումբին նախազգուշական բաժանմունքին եւ կեդրոնի բժիշկներուն` Ազնիւ Մանոյին եւ Յարութիւն Այնթէպլեանի եւ Սիրուն Վարդապետեան:
Յայտնենք նաեւ, որ իւրաքանչիւր ներկայ պիտի օգտուի անվճար արեան քննութենէ: