ԼՕԽ-ի ''Կարս '' մասնաճիւղի Համբարձման Տօնի աւանդական պտոյտը այս տարի կազմակերպուեցաւ դէպի Այնճար , Շրջանային Վարչութեան ներկայացուցիչ՝ ընկհ. Սանդուխտ Հերկելեանի , Շրջանային Վարչութեան Դաստիարակչական Յանձնախումբէն եւ մասնաճիւղէն անդամուհիներու եւ շրջանէն ԼՕԽ-ի բարեկամներու մասնակցութեամբ :
80 հոգինոց խումբը առաջին հերթին այցելեց վերանորոգուած Ազգային Բուժարանը , ուր բժշկապետ Մկրտիչ Պետրոսեան լայնօրէն անդրադարձաւ բուժարանին ընձեռած բժշկական եւ ընկերային կարելիութիւններուն , որոնք եթէ չեն գերազանցեր՝ բայց հաւասար են եւրոպական թէ Ամերիկեան տուեալներուն :
Մասնաճիւղի հրաւէրով Այնճարի Ս. Պօղոս եկեղեցւոյ մէջ Գերաշնորհ Տէր Վարուժան Արք. Հերկելեան օրհնեց մէկ օր առաջ պատրաստուած Համբարձման վիճակը , ներկաներուն փոխանցեց օրուան խորհուրդին իմաստը ու մեր իրականութեան մէջ անոր գործադրութեան եւ գործնա-կանացման անհրաժեշտութիւնը . վերանորոգուելու Աստուածամօր լոյսով պահպանելու համար մեր հաւատքը , լեզուն եւ մշակոյթը : Սրբազան Հայրը լայնօրէն անդրադարձաւ հայ մօր , հայ կնոջ ու մանաւանդ ԼՕԽ-ականի առաքելութեան, վեհութեան , անեղծ պահպանումին , շեշտելով որ Հայ Մայրը՝ ըլլալով հայ ընտանիքին հաստատ պահպանումին գրաւականը , անհրաժեշտ է որ ան մտքով ու հոգիով զինուի դիմակալելու համար իր առջեւ ցցուող ազգային , ընկերային եւ այլ մարտահրաւէրները :
Ապա մասնակիցները Հ Յ Դ '' Սարգիս Զէյթլեան '' Կեդրոնին մէջ հիւրընկալուեցան ԼՕԽ-ի '' Աղթամար '' մասնաճիւղի վարչութեան եւ ընկերուհիներուն կողմէ : Վարչութեան ատենապետուհի՝ ընկհ. Ցողիկ Հաւաթեան բարի գալուստի խօսքէն ետք անդրադարձաւ մասնաճիւղի աշխատանքային մարզերուն եւ շրջանին մէջ գործող ԼՕԽ-ի դարմանատան գործունէութեան :
Ապա , բոլորը այցելեցին Այնճարի քաղաքապետարան եւ հանդիպում ունեցան Այնճարի քաղաքապետ ընկ. Կարօ Փամպուքեանին հետ : Ընկերը ամփոփ , բայց ամբողջական ձեւով ներկայացուց Գիւղաւանին պատմութիւնը , սկսելով Մուսա Տաղի հերոսական օրերէն մինչեւ այսօր , անդրադառնալով ներկայի իրագործումներուն , զարգացումներուն եւ մեծ ճիգին , որպէսզի Այնճար գիւղաւանը չի կորսնցնէ հայկական սփիւռքի մէջ միակը եղող իր իւրայատուկ դիմագիծը : Ան նաեւ պատասխանեց ներկաներուն հարցումներուն :
'' Արեւ '' Ճաշարանին մէջ հաւաքական ճաշի ընթացքին տեղի ունեցաւ Համբարձման Տօնին առիթով իւրաքանչիւր ներկայի վիճակ քաշելն ու այս տարուան բախտը գիտնալու արարողութիւնը : Այս առիթով խօսք առաւ մասնաճիւղիս մօտ Շրջանային Վարչութեան ներկայացուցիչ՝ ընկհ. Սանդուխտ Հերկելեան , որ գնահատելէ ետք մասնաճիւղի միամեայ հաւաքական գործունէութիւնը , անհրաժեշտ նկատեց ԼՕԽ-ի շարքերը երիտասարդ ուժերով հարստացնելու անհրաժեշտութիւնը : Տեղի ունեցաւ վիճակաձգութիւն եւ կոկիկ գեղարուեստական յայտագիր :
Դժբախտաբար ՝ ժամանակի չգոյութեան պատճառով , ծրագրին մաս կազմող Այնճարի բերդի այցելութիւնը կարելի չ'եղաւ :
