1951 թուականին Լիբանանահայ օգնութեան խաչի Շրջանային վարչութիւնը իր սեփական միջոցներով Շթորայի մէջ հիմը կը դնէր «Նիկոլ Աղբալեան» դպրոցին, ընդարձակ սրահ մը, իր յարակից սենեակներով: Սրահին մէջ տեղի կ՛ունենային եկեղեցական արարողութիւնները, իսկ ամառը` ԼՕԽ-ի կողմէ կը վերածուէր ամառնային կազդուրման կայանի:
Կազդուրման կայանը հիմնուեցաւ հիւղաւաններու տաք եւ ոչ առողջապահական կլիմային մէջ ապրող չքաւոր ընտանիքներու տկարակազմ մանուկներուն համար: Տարիներ շարունակ հարիւրաւոր աշակերտներ տարբեր հանգրուաններով մաս կազմեցին կազդուրման կայանին, մաքուր ու առողջ կլիմայի մէջ անցուցին հաճելի ժամանակ եւ ունեցան դաստիարակիչ մթնոլորտ:
Իբրեւ փոփոխութիւն` քանի մը տարի կազդուրման կայանը տեղի ունեցաւ Մեթնի շրջանի Պուա տը Պոլոնեայի դալարածածկ շրջանին մէջ: Լիբանանի քաղաքական թէ տնտեսական ծանօթ պայմաններու բերումով, վեցամեայ ընդհատումէ ետք, կազդուրման կայանը մէկ տարի տեղի ունեցաւ «Թռչնոց բոյն»-ի մէջ, իսկ այսօր տեղի կ՛ունենայ Այնճարի Ազգային Յառաջ-Գ. Կիւլպէնկեան վարժարանին մէջ` նոր շունչ ու ոգի տալով մեր մանուկներուն:
Կազդուրման կայանին գլխաւոր նպատակն է մասնակցող փոքրիկներուն ապահովել հոգեկան ու ֆիզիքական առողջ, հաճելի եւ օգտաշատ կեցութիւն: Կայանին 20-օրեայ ծրագիրը կը գործադրուի մասնագիտական անձնակազմով: Ծրագիրը կ՛ընդգրկէ` բարոյախօսական դասախօսութիւններ, պտոյտներ, խաղեր եւ ձեռային աշխատանքներ, իսկ վերջին շաբթուան ընթացքին կը պատրաստուի ձեռային աշխատանքի ցուցահանդէս եւ կայանի փակման հանդիսութիւն:
Կազդուրման կայանի ամբողջական աշխատանքը կ՛իրագործուի, Շրջանային վարչութեան ընկերային յանձնախումբին կողմէ: Յանձնախումբը գործակցաբար մասնաճիւղերու վարչութիւններուն կը պատրաստէ մասնակցող կարիքաւոր փոքրիկներու անուանացանկը, ապա կը կատարէ ծնողներու հետ հանդիպում-դասախօսութիւն մը:
Կազդուրման կայանի նիւթականը կ՛ապահովուի Շրջանային վարչութենէն, ազգայիններէ, հայ եւ օտար հաստատութիւններէ, անհատներէ, Այնճարի հայրենակիցներէ եւ ԼՕԽ-ի մասնաճիւղերէ:
Այսօր նորակառոյց «Ալեքսան եւ Արաքսի Գըլպաշեան» կազդուրման կայանը մեծապէս պիտի նպաստէ ԼՕԽ-ի կենսական առաքելութեան ծաւալման:
Կը մնանք երախտապարտ եւ շնորհակալ կազդուրման կայանի գաղափարը յղացող ու այս ծրագրին հաստատումին հիմնաքարը զետեղող ու աւանդը շարունակող բոլոր ԼՕԽ-ականներուն, որոնց աշխատանքին ու զոհաբերութեան շնորհիւ այս կենսական գործը յաջողութեամբ կը շարունակէ իր առաքելութիւնը:
