ՀՅԴ Թեկնածուներու Ծանօթացման Հանդիպում ԼՕԽ-ականներու Հետ

Back
«Երբ Հաւաքականութիւնը Կը Ներկայացնես, Հաւաքականութեան Ուժը Քու Հոգիիդ Մէջ Կ՛ըլլայ» Ըսաւ Յակոբ Բագրատունի

ԼՕԽ-ի Շրջանային վարչութեան կազմակերպութեամբ, երէկ` հինգշաբթի, 19 ապրիլ 2018, առաւօտեան ժամը 10:30-ին, «Յակոբ Տէր Մելքոնեան» թատերասրահին մէջ տեղի ունեցաւ ԼՕԽ-ականներու հանդիպում` ՀՅԴ Լիբանանի Կեդրոնական կոմիտէի առաջադրած չորս թեկնածուներուն հետ: Ներկայ էին ՀՅԴ-ի առաջադրած երեք թեկնածուները` ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի, Յակոբ Թերզեան եւ Սերժ Չուխատարեան:

Հանդիպումը սկսաւ Լիբանանի եւ ՀՕՄ-ի քայլերգներուն ունկնդրութեամբ:

ԼՕԽ-ի Շրջանային վարչութեան անունով խօսք առաւ ԼՕԽ-ի Շրջանային վարչութեան ատենապետ Մարալ Մխճեան: Ան ըսաւ, թէ Լիբանանահայ օգնութեան խաչը, ճանչցուած` իբրեւ մարդասիրական միութիւն, ո՛չ միայն կը ձգտի բարւոք կեանք ապահովել հայորդիին, այլ նաեւ իր լայնածաւալ գործունէութեան ընդմէջէն կը նպատակադրէ միջոցներ գտնել ծառայելու համար իր ազգին եւ գաղութին: Ներկայիս կը գտնուինք քաղաքական անկիւնադարձային իրավիճակի մը մէջ, ուր հայու ձայնն ու կամքը անգամ մը եւս պիտի փաստէ լիբանանահայութեան գոյութեան եւ դերակատարութեան անժխտելիութիւնը ի դէմս մեր սիրելի Լիբանանի:

Իր խօսքի աւարտին Մխճեան ըսաւ, թէ մենք ճանչցուած ենք իբրեւ ազգին լուռ ու համեստ ծառայողները, ազգին պահապանները. եկէք համախմբուինք, մէկ բռունցք ըլլանք, ամրակուռ ժայռ դառնանք եւ միասնաբար փութանք հոն, ուր ազգին իրաւունքն ու պարտականութիւնը մեզ կը կանչէ:

Ապա ներկաները դիտեցին ՀՅԴ Լիբանանի Կեդրոնական կոմիտէի Քարոզչական մարմինին կողմէ պատրաստուած տեսերիզ մը, որ ներկայացուց քուէարկութեան ձեւը, թեկնածուներուն կենսագրականը եւ ԼՕԽ-ական ընկերուհիներու տեսակէտները, որոնք զօրակցութիւն յայտնեցին Դաշնակցութեան թեկնածուներուն:

Ելոյթ ունեցաւ Պէյրութի Ա. ընտրաշրջանի հայ կաթողիկէ աթոռի թեկնածու Սերժ Չուխատարեան: Ան ըսաւ, թէ հայ կինը մեր ժողովուրդին կէսն է, հայ կինը ընտանիք կազմելու մէջ հիմնական դերը կը կատարէ: Ապա ողջունեց ԼՕԽ-ի գործունէութիւնը, զոհողութիւնները եւ ծառայութիւնը հայ ժողովուրդին: Ան ըսաւ նաեւ, թէ «երբ խորհրդարան հասնինք, մենք ալ մեր կարգին պիտի ծառայենք հայ ժողովուրդի զաւակներուն: Երբ կարենանք երկրի տնտեսութիւնը բարելաւել, բնականաբար ԼՕԽ-ի բեռը թեթեւցուցած կ՛ըլլանք: Մայիս 6-ին միասնաբար պիտի քուէարկենք Դաշնակցութեան եւ մայիս 7-ին միասնաբար պիտի տօնենք մեր յաղթանակը:

Ապա խօսք առաւ Պէյրութի Ա. ընտրաշրջանի հայ առաքելական աթոռի թեկնածու Յակոբ Թերզեան: Ան խօսքը ուղղելով ԼՕԽ-ականներուն ըսաւ. «Դուք մեզի ո՛չ միայն պատիւ կը բերէք, այլեւ սիրով կամաւոր գործ կը կատարէք: Դուք ազգը լաւ կը ճանչնաք: Ձեր թեկնածուները դուք կը ճանչնաք: Հայ ծնիլը, հայու անուն կրելը մեծ պատիւ է. հայ կը կոչուի մարդ միայն ծառայութեամբ. կը խոնարհիմ ձեր ծառայութեան առջեւ»: Իր խօսքի աւարտին ան  շնորհակալութիւն յայտնեց բոլոր ԼՕԽ-ականներուն եւ ըսաւ. «Մենք ձեր կողքին պիտի մնանք»:

Այնուհետեւ խօսք առաւ Մեթնի հայ առաքելական աթոռի թեկնածու, ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի: Ան ըսաւ, թէ երեսփոխանական ընտրութիւններուն թեկնածուները կը ներկայանան իրենց քաղաքական ծրագիրներով. խորհրդարանին մէջ շատ ընելիքներ կան` վարձքերու օրէնքէն սկսեալ, որուն դէմ էինք մենք, ամսականներու յաւելման հարց, որուն մենք թեր էինք, երկրի օրէնսդրական հարցեր, բոլորը բնականաբար պիտի ընենք իբրեւ երեսփոխան, բայց տարբերութիւնը լիբանանահայ երեսփոխանին միջեւ եւ լիբանանցի պարզ երեսփոխանին միջեւ լեռ ու ձորի տարբերութիւն է: «Լիբանանի հայ երեսփոխանը փոսի, ջուրի, ելեկտրականութեան մասին պարտաւոր է խօսիլ, բայց լիբանանցի երեսփոխանը անգամ մը որ ընտրուի, իր համայնքի ընկերային հարցերու մասին, իր համայնքի ինքնութեան պահպանման մասին չի խօսիր. միայն մենք կը խօսինք, մեր պարտականութիւնն է խօսիլ անոր մասին, որովհետեւ մեզի համար երեսփոխանութիւնը, քաղաքապետութիւնը, պետական պաշտօնները պարզապէս համայնքի ներկայացուցչութիւն չեն, մեզի համար այդ բոլորը, որոնք կը տրուին ձեր վստահութեամբ, այդ բոլորը մեր համայնքի ամուր ամրապնդուած կամքի պահպանման համար են», ըսաւ ան: Յ. Բագրատունի հաստատեց, որ մեր պայքարը Լիբանանի մէջ օրէ-օր օտարացումի դէմ պայքարն է, մեր պայքարը Լիբանանի մէջ հայերէն մոռցողներու դէմ պայքարն է, մեր պայքարը Լիբանանի մէջ հայկական մեր միջավայրէն հեռացողներուն դէմ պայքարն է, մեր պայքարը Լիբանանի մէջ իբրեւ երեսփոխաններ, իբրեւ համայնք, իբրեւ կուսակցութիւններ, հայը հայ պահելու պայքարն է: Մեր պայքարը մեր ժողովուրդին համար պայքարն է: Մարդիկ կրնան ատել Դաշնակցութիւնը, մարդիկ կրնան ատել Հնչակեան կուսակցութիւնը, Ռամկավար կուսակցութիւնը, բայց մարդիկ չեն կրնար ատել եւ իրաւունք չունին ատելու իրենց համայնքը:

Երեսփոխան Բագրատունին նշեց, որ Լիբանանի մէջ քաղաքացիական պատերազմէն այսօր լիբանանեան բոլոր կուսակցութիւնները բաժնուեցան: Մեզ ալ փորձեցին բաժնել, բայց չյաջողեցան: Ինչո՞ւ չյաջողեցան, որովհետեւ մենք մեր կողքին ժողովուրդ ունինք, մեր կողքին հաւատացեալ մարդիկ ունինք, հաւատացեալ հայեր, որոնք կը հաւատան Աստուծոյ` իբրեւ կրօն եւ կը հաւատան հայկականութեան` իբրեւ ազգ:

Ան ըսաւ. «Ցոյց տուէք ինծի Լիբանանի մէջ համայնք մը, որ յաջողած է պետութեան բացակայութեան իր համայնքին գործերը ղեկավարել, ցոյց տուէք համայնք մը, որ 4000 անդամ ունեցող Օգնութեան խաչ ունի եւ որոնք առանց ամսականի, առանց փոխարժէքի գիշեր ու ցերեկ գործի մէջ են. դեկտեմբերի ցուրտին տունէ-տուն կը շրջին.  որ օրացոյց ծախեն, ամրան տաքին կազդուրման կայան կը կազմակերպեն Այնճարի մէջ, ԼՕԽ-ի հանգանակութեան օր կ՛ընեն` գումար հաւաքելու նպատակով: Ցոյց տուէք համայնք մը, որ Համազգայինի նման կառոյց ունի եւ կ՛ուզէ, որ հայ երեխան հայկական պար սորվի, հայկական երաժշտութիւն սորվի. մարզախումբ մը, որ հսկայ միութիւն է, 100 տարեկան եղաւ արդէն, ուր երեխաները կ՛երթան, որպէսզի հեռու մնան մոլութիւններէ, թմրեցուցիչներէ եւ տարբեր տեսակի ախտերէ, ցոյց տուէք համայնք մը, որ իր ժողովուրդին համար բնակարաններ կը շինէ: Առաջին համայնքը, որ ժողովրդային բնակարան շինեց, մենք ենք: Ցոյց տուէք քաղաքապետութիւն մը, որպէսզի շրջանը հայ մնայ, 190 յարկաբաժին կը կառուցէ: Ցոյց տուէք համայնք մը, որ տպարան կը հաստատէ, գիրք եւ թերթ կը հրատարակէ, այս բոլորը մենք կ՛ընենք եւ ասոր համար նախանձելի ենք եւ մարդիկ չեն սիրեր մեզի»:

Ապա խօսքը ուղղելով ԼՕԽ-ականներուն` երեսփոխան Բագրատունի, ըսաւ. «Սիրելինե՛ր, քուէն ծախողը հոգին է, որ կը ծախէ, իրենց մնացած ժառանգն է, որ կը ծախէ, այս թաղամասերը պաշտպանող մեր նահատակ տղոց արիւնն է, որ կը ծախէ, իր խիղճն է, որ կը ծախէ: Մեր պայքարը հաւաքական պայքար է: Ձեր միտքը, ձեր հոգին, ձեր ձայնը, ձեր անցեալը, ձեր աւանդը ծախու չեն, չեն կրնար ըլլալ: Եթէ այդպէս ըլլար, շատոնց մենք պարտուած կ՛ըլլայինք, 2000-էն ի վեր երկու երեսփոխանով գործ կատարեցինք, եւ մեր համայնքի իրաւունքներէն ոչինչ զիջեցանք. մեզի դէմ կռիւ բացին օտար դեսպանութիւնները, մեզի դէմ կռիւ բացին օտար գաղտնի սպասարկութիւնները, մեզի դէմ կռիւ բացին մեզմէ տասնապատիկ զօրաւոր կուսակցութիւնները, բայց մենք մնացինք ինչ որ ենք, չփոխուեցանք, չտկարացանք, որովհետեւ հաւատացինք հաւաքական ուժին եւ ոչ թէ անհատական ուժին: Երբ հաւաքականութիւնը կը ներկայացնես, հաւաքականութեան ուժը քու հոգիիդ մէջ կ՛ըլլայ, երբ ետեւ նայիս, կռնակդ ժողովուրդ կը տեսնես եւ ոչ թէ միայն դրամով գնուած քուէարկողներ»:

Յ. Բագրատունը ըսաւ, թէ բնականաբար կ՛ուզենք Դաշնակցութեան թեկնածուներուն յաջողութիւնը, որովհետեւ կը հաւատանք, որ ձեր կողմէ մեզի նկատմամբ տրուած վստահութիւնը աւելիով կրնանք փոխադարձել: Եթէ Դաշնակցութեան թեկնածուները պիտի չյաջողին, նոյնքան հպարտ կ՛ըլլանք, եթէ յաջողի հնչակեան թեկնածուն, եթէ յաջողի ռամկավար թեկնածուն, որովհետեւ վերջին հաշուով իւրաքանչիւրը կը ներկայացնէ իր կուսակցութիւնը, իր հաւաքականութիւնը, պատմական անցեալ ունեցող կուսակցութիւն: Դուք, որ ամբողջ ձեր գիտակցական կեանքը նուիրած էք ձեր միութեան, մայիս 6-ին քուէարկեցէ՛ք ձեր նախընտրած թեկնածուին, քուէարկեցէ՛ք անոր, որ ձեզի կը նմանի:

Մենք ԼՕԽ-ը անուանած ենք քոյր միութիւն, ուղեկից միութիւն. Հայ օգնութեան միութիւնը հիմնուած  է Դաշնակցութեան կողմէ, ընկ. Ակնունիին կողմէ. հոս Լիբանանի մէջ դարձեալ այդ աշխատանքը տարուած է Դաշնակցութեան կողմէ, որպէսզի երբ մեր ժողովուրդը ցաւ ունենայ` ցաւին հասնող ունենայ, երբ վէրք ունենայ` վէրքը բժշկող ունենայ` երբ ծեր ունենայ` ձեռքին գաւազան տուող ունենայ, երբ անօթի երեխայ ունենայ` երեխային ուտելիք հասցնող ունենայ, բոլորը ըրած ենք առանց ձայնի: Հայը հայուն հետ ամուսնացնելու համար ֆոնտ հաստատեցինք, երեխան մկրտելու համար ֆոնտ հաստատեցինք, երրորդ զաւկին համար ֆոնտ հաստատեցինք, 153 ուսանողի կրթական ֆոնտ տուինք եւ ոչ մէկուն հետ կապուեցանք, որ մեզի քուէարկեն, ոչ մէկուն ալ պիտի ըսենք, որ մեր կատարածին փոխարէն մեզի քուէարկեցէք: «Մեր հիմնական նպատակը Դաշնակցութեան առաջադրած թեկնածուներուն յաջողութիւնն է, որ քաղաքական իրաւունք է վերջին հաշուով. երբ մարդոց կ՛օժանդակենք, միայն մարդասիրական մեկնակէտէ չենք ըներ ատիկա. մենք կ՛օժանդակենք մարդուն, երեխային, անկարին, ծերին, ընտանիքին, ուսանողին, որպէսզի հայ մնայ, ոչ թէ պարզապէս որովհետեւ կարիք ունի. մեր նպատակը կարիքաւորին հասնիլ է, որպէսզի օտարին ձեռք չերկարէ. այսօր մեր հոգիներուն մէջ կը տառապինք մեր ակռաները կը կճռտենք, երբ կը լսենք, որ հայը դրամով ծախուած է, արժանապատուութեան ի՜նչ անկում, մարդ հոգին կը ծախէ՞, մարդ ազատութիւնը կը ծախէ՞: Մեր պայքարը Լիբանանի մէջ հայը հայ պահելու պայքարն է, ով որ կ՛ուզէ հայ մնալ, թող քուէարկէ մեզի», եզրափակեց երեսփոխան Յակոբ Բագրատունին: