Սեմինար՝ Առողջ Ապրելակերպ

Back

ԼՕԽ-ի Շրջանային Վարչութեան առողջապահական յանձնախումբը, որ կը գործակցի ԱՊԸԲ կեդրոնի նախազգուշական բաժանմունքին հետ, 2016-2018 շրջանին իր առաջին ժողովին ճշդեց երկամեայ ծրագիրը: Սովորական դասախօսական շարքերու կազմակերպման զուգահեռ նախաձեռնեց նոր ծրագիր մը՝ երիտասարդ մայրերու համար սեմինարներու շարք մը, անոնց մէջ յառաջացնելու առողջ ապրելաձեւի գիտակցութիւն, փոխանցելու հանրային, առողջապահական, հոգեբանական, տնային ընդհանուր եւ այժմէական գիտելիքներ, զաւակ- ծնողք փոխ յարաբերութեան մասին առողջ մտածումներ:

Յիշեալ սեմինարներուն նպատակն էր երիտասարդուհիները գիտակից դարձնել, հեռու պահել զանոնք հիւանդութիւններէ եւ մոլութիւններէ հաւատալով, որ առողջ ընտանիքի հիմքը մօր դաստիարակութիւնն է: Ինչպէս նաեւ ստեղծել ընկերային մթնոլորտ, ծանօթացնել ԼՕԽ-ի լայնածաւալ աշխատանքը  եւ ԼՕխ-ի երդիքին տակ իրարու ծանօթանալով նոր բարեկամութիւններ հաստատել:

Ծրագիրը վաւերացուելէն ետք Շրջանային Վարչութեան կողմէ, կացմակերպուեցան 9 սեմինարներ, ուր իրենց մասնակցութիւնը բերին 25 երետասարդ հայ մայրեր: Առողջապահական յանձնախումբին կողմէ ճշդուած նիւթերը ներկայացուցին տարբեր մասնագիտութիւններու տէր դասախօսներ:

Վերջին սեմինարը տեղի ունեցաւ Չորեքշաբթի, 23 Մայիս 2018-ին, ԱՊԸԲ կեդրոնի «Թնճուկեան» սրահին մէջ: ԼՕԽ-ի քայլերգի ունկնդրութենէն ետք, յանձնախումբի ատենապետուհի՝ տոքթ. Սիրուն Վարդապետեան բարի գալուստ եւ շնորհակալութիւն յայտնեց ներկաներուն,  յանձնախումբի բոլոր անդամներուն եւ Շրջանային Վարչութեան ներկայացուցիչ՝ ընկհ. Իսկուհի Գաբլանեանին, որ միշտ մօտէն հետեւած էր յանձնախումբի աշխատանքներուն:

Մայիս ամիսը «Մայերու Օր»ուան ամիս ըլլալով, ան շնորհաւորեց բոլորը մաղթելով, որ տիպար հայ մայր ըլլան եւ ծառայեն ո′չ միայն իրենց ընտանիքին, այլ եւ իրենց ազգին:

Օրուան առաջին դասախօսն էր ընկհ. Արեգնազ Աղասարգիսեան, որ ներկայացուց «Դպրոցական դժուարութիւններ եւ կրթական յաջողութեան գրաւականը» նիւթը:

Ան շեշտը դրաւ հետեւեալ կէտերուն.-

  • Գիտնալ զաւակի մը կրթական կեանքի ընթացքը
  • Կարգ մը աշակերտներու կանուխ տարիքէն դպրոցը լքելու պատճառները
  • Ծանօթանալ զաւակիդ ուսուցիչ-ուսուցչուհիներուն
  • Օգնել եւ վարժեցնել դասաւորելու իր աշխատանքը
  • Հետեւիլ անոր կատարելու իր պարտականութիւնները
  • Հեռու պահել զայն խանգարող տուեալներէ
  • Զարգացնել անոր հետաքրքրութիւնները՝ մարզական, արուեստ…

Սեմինարի երկրորդ բաժինով տոքթ. Վարուժան Մարկոսեան ներկայացուց «Պատուաստներու  տեսակներն ու անոնց անհրաժեշտութիւնը» նիւթը:

Ան նշեց, թէ գոյութիւն ունին ստիպողական եւ ըստ ցանկութեան կատարուող պատուստներ: Մեր շրջապատի միքրոպներէն պաշտպաուելու համար, շատ փոքր տարիքէն կը սկսինք պատուաստներուն: Առողջ մարմնին մէջ կը սրսկենք մեռած միքրոպներ, որպէսզի մամնին մէջ հակամարմիններ ստեղծուին եւ վարակման պարագային հիւանդութեան ընթացքը ըլլայ թեթեւ:

Սեմինարի աւարտին, ներկաները հիւրասիրուեցան ճաշով եւ անուշեղէնով , որ պատրաստուած էր սեմինարին մասնակցողներուն կողմէ: Անոնք բաժնուեցան իրենց հետ տանելով Պուրճ Համուտի քաղաքապետութեան կողմէ տրամադրուած ծաղիկի թաղարներ, յանձնախումբին պատրաստած նուէրները եւ յառաջիկայ տարի դարձեալ հանդիպելու փափաքով: